Garoowe (Dalkaan.com) – Maamulka Puntland ayaa markii u horeysay go’aamo adag kasoo saaray xiisada ka dhalatay sicir bararka muddooyinkii dambe faraha ba’an ku hayay deegaanada maamulkaasi, xili ay ganacsatada qaar ay diideen shilinka Soomaaliga.

Puntland ayaa soo rogtay in laga bilaabo maalinta Sabtida aan adeega lacagta mobile-ka la iskugu diri karin hal doolar iyo wixii ka yar, iyada oo la faray shirkadaha SAHAL, E- DAHAB iyo kuwa la mid ah inay ka saaran system-kooda.

Advertisement

“Iyadoo laga jawaabayo cabashooyinka la xiriira Sarifka lacagaha, Dowladdu waxay go’aamisay laga bilaabo 05 December 2020 in  $1 iyo wixii ka yar aan lagu diri Karin adeega lacagta-danbeysan ee Mobile-da la isugu diro sida SAHAL, E- DAHAB iyo kuwa la mid ah” ayuu yiri Afhayeenka xukuumadda Jaamac Yuusuf Dabaraani.

Waxa kale oo go’aamadaasi lagu faray in Xafiisyada dowladda hoose ee degmooyinka maamulkaasi ay qaadan karaan Shilinka Soomaaliga, oo aysan diidi karin xili uu dhawaan madaxweynaha Puntland amray in canshuuraha deegaanada maamulkiisa lagu qaado lacagta Doller-ka Mareykanka ah.

Sidoo kale waxay dowlad goboleedka Puntland ay fartay ganacsatada iyo bulshada deegaanadeeda in marnaba aan la joojin karin isticmaalka Shilinka Soomaaliga, isla markaana ay qaadan karaan.

“Xafiisyada Dowladdaha hoose ee degmooyinkana waxaa la faray inay qaadan karaan Shillin Soomaaliga oo aysan diidi Karin” ayaa lagu yiri qoraalka.

Waxa kale oo lagu yiri “Isticmaalka Shillin Soomaaliga lagama joojin deegaanada Puntland, wax waad ku iibsan kartaa, waana lagaga iibsan karaa”.

Puntland ayaa muddooyinkii dambe la daala dhaceysay sicir bararka, iyada oo deegaanadeeda uu ka dhaliyay xiisad hor leh oo looga soo horjeedo maamulka Saciid Deni, maadama ay ku fashilantay wax ka qabashada arrintaasi.

Source: dalkaan.com

LEAVE A REPLY

Please enter your comment!
Please enter your name here